Uyu munsi ku wa Gatanu, tariki 13 Kamena, 2025, umuryango mugari w’Ikigo cy’Igihugu gishinzwe Iterambere ry’Ubwikorezi (RTDA), wibutse ku nshuro ya 31 Jenoside yakorewe Abatutsi mu 1994. Uyu muhango wabereye ku rwibutso rwa Jenoside rwa Ntarama, aho umushyitsi mukuru yari Umunyamabanga Uhoraho muri Minisiteri y’Ibikorwaremezo, Bwana ABIMANA Fidele.

Uyu muhango, wabimburiwe n’igikorwa cyo kuremera (Koroza) inka ihaka uwarokotse Jenoside yakorewe Abatutsi mu 1994, MUKAMURANGWA Alphonsine. Iyi nka yatanzwe na RTDA, usibye kuba ari igisobanuro cy’umuco, ni no kongera kuzirikana no gufasha uwarokotse Jenoside mu mibereho ye ya buri munsi.

Mu ijambo ry'ikaze, Umuyobozi mukuru wa RTDA Bwana Imena MUNYAMPENDA, yashimiye abitabiriye iki gikorwa: “Mu izina ryanjye bwite n’iry’ abakozi ba RTDA muri Rusange, ndabashimiye byimazeyo kuba mwaje kwifatanya natwe muri iki gikorwa cyo gusubiza abacu bazize Jenoside yakorewe abatutsi mu 1994 icyubahiro. Mbifurije ikaze hano ku Rwibutso rwa Jenoside yakorewe abatutsi rwa Ntarama, ahantu twibukira abacu b’inzirakarengane zazize Jenocide yakorewe abatutsi mu 1994. Kuba turi hano uyu munsi ni ikimenyetso cy’ubumwe n’ubufatanye. Ntitwahuriye hano gusa ngo tubabare, ahubwo turi hano ngo twiyemeze kurinda amahoro n’ubumuntu. Tuvuga tuti Ntibizongere ukundi, bitari mu Rwanda gusa, ahubwo no ku isi hose.”

“Aha ni ahantu hera ku mitima yacu, habitse Imibiri  y’inzirakarengane zirenga ibihumbi bitanu (5000), zahiciwe urw’agashinyaguro muri Jenoside yakorewe Abatutsi mu 1994. Benshi bahahungiye bizeye ubuzima, ariko bahasize ubuzima, bishwe urubozo.” - Umuyobozi mukuru wa RTDA/Imena MUNYAMPENDA.

Umuyobozi mukuru wa RTDA yakomeje kandi ashimira by’umwihariko ingabo za RPA zitanze zigahagarika Jenoside ziyobowe n’intore izirusha intambwe, Nyakubahwa Perezida wa Repubulika Paul KAGAME.

Muri uyu muhango wo kwibuka ku nshuro ya 31 Jenoside yakorewe abatutsi mu 1994, hacanwe urumuri rw’icyizere, maze umuhanzi uzwi cyane mu ndirimbo zo kwibuka MUNYENSHOZA Dieudonne akora mu nganzo atambutsa ubutumwa bw’ihumure n’icyizere abinyujije mu ndirimbo ze.

Mu bandi batambukije ubutumwa bw’ihumure, harimo uwaruhagarariye IBUKA washimiye RTDA ku gikorwa yateguye cyo kongera kuzirikana no guha icyubahiro inzirakarengane zazize Jenoside yakorewe abatutsi mu 1994.

Umuyobozi w’inama y’ubutegetsi ya RTDA, Dr. Leopold MBEREYAHO, na we yagarutse kuri amwe mu mateka y’amacakubiri yaganishije u Rwanda mu icuraburindi rya Jenoside yakorewe abatutsi mu 1994, ahumuriza abarokotse Jenoside yakorewe abatutsi mu 1994, anabashishikariza kudaheranwa n’agahinda, kandi abizeza ko hari icyizere cy’ubuzima kuko ibimenyetso byigaragaza bijyanye n’aho igihugu cyavuye ndetse n’aho kigeze mu rugendo rwo kwiyubaka.

Umubyeyi MUKABUKIZI Angelique warokokeye I Ntarama, yasangije abitabiriye uyu muhango ubuhamya bushaririye bw’ibyo yanyuzemo we n’umuryango we cyane cyane itotezwa yakorerwaga na mbere ya Jenoside nyirizina, ndetse n’iyicwarubozo ririmo ubugome bw’indengakamere mu gihe cya Jenoside yakorewe abatutsi mu 1994.

Mu butumwa bwe, umushyitsi mukuru Bwana ABIMANA Fidele yagize ati: 

“Kwibuka Jenoside yakorewe Abatutsi mu 1994 binyuze mu nzego zitandukanye z’imirimo ni umuco mwiza, kuko bituma twongera kwiyegeranya nk’abantu bahuriye ku murimo umwe, tukazirikana amateka mabi yaranze igihugu cyacu, tukanibukiranya ko tutagomba guheranywa na yo, tukambarira urugamba rw’iterambere. Tuziko iterembere rituruka mu mirimo itandukanye dukora nk’abanyarwanda, harimo ibikorwaremezo ndetse n’ubwikorezi.

Yakomeje agira ati: "Bitwibutsa kandi ko n’ubwo dufite inshingano zinyuranye, aho dukorera hose dukwiye kuba umusingi w’ukuri, ubunyangamugayo n’icyubahiro ku buzima bwa muntu. Uyu ni umwanya wo kuzirikana amateka mabi twanyuzemo, tugafata ingamba zituma atazongera kubaho ukundi, tugaharanira kuba umusemburo w’indangagaciro nziza, haba aho dukorera, aho dutuye ndetse n’aho tugenda hose. Mu nshingano zacu za buri munsi, mu kazi dukora, ni ngombwa ko dutekereza buri gihe kubaka ejo hazaza, tukimakaza ubumuntu, ubumwe, tugaharanira ko ibyabaye bitazongera kubaho na rimwe. Nibwo buryo nyabwo bwo guha agaciro abo twibuka.”

Umushyitsi mukuru muri uyu muhango wo kwibuka Jenoside yakorewe Abatutsi mu 1994, yasoje ubutumwa bwe bw’ihumure yifuriza abanyarwanda bose gukomera muri iki gihe twibuka Jenosisde yakorewe abatutsi mu 1994.