Uyu munsi, ubuyobozi n’abakozi b’Ikigo cy’Igihugu gishinzwe Iterambere ry’Ubwikorezi (RTDA) bibutse ku nshuro ya 30 Jenoside yakorewe Abatutsi mu 1994. Uyu muhango ukaba wabereye ku rwibutso rwa Jenoside rwa Nyanza, ruherereye mu karere ka Kicukiro.

Ni igikorwa cyahurije hamwe abantu b’ingeri zitandukanye, barimo ubuyobozi n’abakozi ba RTDA, abahagarariye Ibuka, n’inzego z’umutekano mu rwego rwo gusubiza amaso inyuma no kuzirikana amateka igihugu cyanyuzemo.

Abitabiriye uyu muhango bafashe umwanya wo gushyira indabo aharuhukiye imibiri  y’abazize Jenoside yakorewe Abatutsi mu 1994, banafata umunota wo kwibuka hagamijwe guha icyubahiro no kwibuka abazize Jenoside yakorewe Abatutsi mu 1994.

Mu ijambo rye, Umuyobozi Mukuru wa RTDA Bwana Imena MUNYAMPENDA, yashimiye abitabiriye uyu muhango wo kwibuka, ashimangira ko kwibuka ari urugendo rudahagarara rwo kubaka ubumwe bw’igihugu cyacu.

"Ndashimira abashyitsi batandukanye baje kwifatanya natwe muri iki gikorwa cyiza cyo kwibuka abacu bazize Jenoside yakorewe Abatutsi muri Mata, 1994. Uruhare rwa buri wese ni ingenzi mu rugendo rwo kwibuka no kuzirikana amateka yacu, gusigasira ibyagezweho, gukomeza umuco wacu wo kwibuka no kubaka ejo hazaza heza kandi habereye u Rwanda." – Imena MUNYAMPENDA

Uyu muhango wari n’umwanya mwiza wo gushimira ubutwari bw’ingabo zari iza RPA Inkotanyi, zari zirangajwe imbere na Nyakubahwa Perezida wa Repubulika, Paul Kagame.

Mu ijambo rye, Umuyobozi w’Inama y’Ubutegetsi ya RTDA Ass. Prof. Leopord MBEREYAHO, yagarutse ku ruhare rw’izo ngabo mu guhagarika Jenoside no kugarura amahoro n’umutekano mu gihugu.

Yagize ati:  "Turashimira ubutwari bwaranze ingabo zari iza RPA Inkotanyi, zari zirangajwe imbere na Nyakubahwa Perezida wa Repubulika Paul Kagame, zo zahagaritse Jenoside zikagarura amahoro, umutekano n’iterambere mu Rwanda."

Kwibuka ku nshuro ya 30 Jenoside yakorewe Abatutsi mu1994, ni ikimenyetso cy’ubushake bw’Abanyarwanda bwo gukomeza inzira yo kwiyubaka no gusigasira amahoro n’iterambere.

Ubuyobozi bwa RTDA bwasabye abitabiriye uyu muhango n’abanyarwanda muri rusange gukomeza kugira uruhare mu kubaka igihugu, baharanira ubumwe, amahoro n’iterambere birambye. Kwibuka ni inzira ituma buri munyarwanda azirikana amateka, akayigiraho isomo, kandi akumva inshingano zo gukomeza kubaka igihugu gitekanye kandi kirangwa n’ubumwe.

Twibuke Twiyubaka. #Kwibuka30.